I mim Tagebuech bliibi mim schwiizerdütsch tröi und schribe för euch mini tollste und lustigste Erlebnis ine insofern dasi ziit han also evtl müender mi ab und zue dra erennere wenn er öppe weder s neuste wend wösse.
September - Oktober
Hallo zäme
Ja zwei ganzi monet hani nömme gschrebe! Es duet mer leid es esch eifach werkli so gse dasi nömme noche cho ben met Absched vorbereite Ferie gnüsse und Homepage schriibe! Ech han au i de letschde 2 mönet no ganz vell erläbt und wett euch ganz gärn alles verzelle die Homepage werdi aber witerhee nömme bruche well si z voll esch si wird aber no ganz lang als erennerig ome sii! Ech ben mer secher spötistens 2017 hemmer bi eus ir Familie 2-3 Fotialbum woner jederzit derfed cho aaluege. Danke nomol vellmal förd onderstötzig!
18.08.16-21.08.16
Das send wedermal ganz spezielli Täg drum werded die jetzt au speziell erwähnt. Und zwar esch d Fabienne am 18. in Gore metem Bus aacho ech han ere gseit ech chan si ned hole han aber churzfristig frei becho ond si öberrascht. Si hed soooo extreem müed uusgseh! :) Ech han ere es Notizbüechli als Gschenkli bastlet und alli wechtige Farm Englisch wörtli driigschrebe. Am obe semmer zum Znacht bi erere Chefin und Chef iiglade gsee. Das esch supper nätt gse so hani chönne starthilf sii förs Fäbi. Si heds extreem guet breicht i dere Familie und esch nome 10 Minute vo mer entfernt. Am Friitig hani derfe eleii mäle und mer send jetzt weder zrugg bi ca 350 Chüeh also es faht aa weder asträngender z werde. D Fabienne hed mer schnell chli gholfe well si Frei gha hed a erem erste Nommittag. Am Obe semmer 40 minute gfahre anes Farmer Quiz und ech han tatsächlech en täsche met warme Chleider im Wert vo 50.- gwonne. Am Samstig hani de Giaccomo am 7nii zu de Bluemountains bracht ond ech ben met de Fabienne ufene Road Trip rechtig Invercargill, Bluff, Riverton und Bondi Beach mer hend au no nach de Blaue Muschle gsuecht. Am obe semmer denn is Pub und si hed de Paul kenneglehrt. Mer hend sogar Pool gspelt gegenand und ech han sogar gwonne wer hätte das gedacht. Am sonntig hemmer welle usschlafe aber mer send Choufme Fraue mer chönd ned länger als achti schlafe also semmer ga iichaufe und denn am Nomi zäme mine Lieblingsspatziergang am Floss nache ga laufe. SI esch s ganze wochenänd sehr müed gse aber ech hoffe ere gfallts mer wird Emmer meh bewusst dases glii hei gaht!
Woche 43
Mer hend d hälfti gschafft scho 150 Chälbli und die meiste schwerige Rindli send verbii jetzt sells anschiinend eifacher werde met de old Ladies. Ech han so rechtig freud a mim momentane Läbe und gniesses in volle Zöge es esch toll wemmer weis am Obe was mer gmacht hed. Ech han a eim Tag derfe metem Aahänger zwei 2000 liter Tänk transportiere (de Chef hed gholfe lade ohni spannset und metem Text: Just dont drive over 70km/h) und metem Hochdruckreiniger potze. So rechtig stolz beni gsii weli vorwärts und Rückwärts de Ahänger au ohni Pröffig nach 9 Mönet Neuseeland rechtig guet im Greff han. Am Mettwuch semmer alli am Mittag ga de Fraser bsueche er esch en Schaffarmer und hed a dem Tag 800 gschore. Das esch definitiv gse wie im Film sine Vater hed eus alles genau erklärt und d Hönd hend eus zeigt wie schnell si 300 Schaf i ei Egge triibet. Ech glaub ech mos mer no öberlegge doch no of en Schaffarm ga z schaffe. Es esch sehr interessant gsi.
Woche 42
D Chälbeli aazahl stiigt rasant mer send jetzt bi 120 und ech ben rechtig müed. Die Woche hed ir schwiiz de Grosbabi Geburtstag gha und ech ha ned chönne debii sii han aber am obe am 10nii mal es Video gmacht wo si ehm dehei zeigt hend wie ech Gratuliere det gseht mer au offesechtlech wie kapott ech vom schaffe alle uusgseh! Am Donnstig esch en ganz spezielle Tag gse d Gesa mini Nachfolgerin esch aacho alli send gspannt gse wer das Fräulein us Dütschland esch. Si hed mis Herz sehr schnell eroberet well si en Mensch esch wo mech zum lache brengt und so vell glachet wie das Wuchenend hani scho länger nömme, mer send zäme uf Gore met de Kids hend Fuessball gspellt und bachet und kochet zäme. Und ned z vergesse am Friitig obe semmer zu fremde Nachbere iiglade worde well si en neui aagstellti gha hend und denn send alli Internationals zäme gsee das esch soo genial gse.
Woche 41
Es esch scho krass ech han jetzt scho Emmer weder so churzi Momänt woni chönnt brüele weli weis dases i 2 Mönet heisst absched nää. Ech han zum Biispel d Chinde die wuche is Tanze bracht und das hed mi dra erenneret a die Tanzshow wo si gmacht hend am aafang vo mim Jahr woni do scho so emozional gfunde han! Aber genau drum heissts jetzt eifach jede Tag umso meh gniesse! Die wuche esch mini hauptverantwortig Die Fütterung der Leute gsi! Und ech ha zemli jede morge d Chinde zum Bett usgnah. Ga mäle beni nomeno zweimal ir Wuche well mer ja jetzt de Giaccomo setted aalere. Am Donnstig obe beni Im Schnee ga sekle und mer esch en schock passiert segi euch ech han d Chopflampe aagha und ben dur de Chuestall zum Nachber und anere Chiesstrass weder zu eusem Huus jogget und da Flüged usem Nachberhuus 3 Änte und hendedrii en schuss! Han denn am nechste Tag erfahre das die Änte anschiinend ene de Garteteich verwüeschtet drum schiesseds jetzt au ir Nacht! manomann mis Herz!!! Ha scho Emmer gseit Jogge esch ned gsund. Und am Friitig obe send d Zwilling bi mer cho öbernachte und am samstig semmer met de WG is Pub.
Woche 40
Mer hend eus definitiv zerst mösse anenand gwöhne en studierti 23 jährigi und ech aber es gaht scho sehr guet es cha ja ned för alli klar sii das zum Biispel Handtüechli und Gschirrtüechli setted zwei verschedeni sii oder das s huus besser schmöckt wemmer de Kompost täglech use duet :) Uf jedefall gniessis rechtig am mittag mal en Pause z ha woni 30 minute änehoke das esch ned gange met de Familie im Huus! Am Friitig vo dere Woche esch de zweit Student iizoge de Giaccomo au us Dütschland esch au ganz en nätte aber au bi ehm heds scho sehr lostigi momänt geh woni denkt ha er sett mal chli weniger im Internet recherchiere und meh praktisch leere! Uf jedefall hemmer jetzt die zwei wuche die 8 erste Chälbli becho und ech ben zwische chälbli, mäle,huushalt und chinde chli de springer öberall wos mi bruucht und das gfallt mer sehr guet. Am SUnntig morge heds s erste mal för meh als 2h liegende Schnee gha!
Woche 39 Mis erste eigete wonheim!! Eis Huus!! Ei WG!!
Die Woche beni weder voll am schaffe gse und ech ben ohni schlimms Jetlag rechtig fliisig gse drum au kei ziit gha zum D Homepage erfrische das duet mer leid! Uf jedefall esch die Woche zemli rassig verbii gange mer hend aagfange Chalberställ parat z mache för afe 60 Chalber und ech ben Uuszoge! I das geniale chli chalte Hüsli 5min. nebem Stall. Well d Christina (neui Paraktikantin us Dütschland) am Donnstig cho esch und d Chefin gfragt hed obi ere well gsellschaft leiste! Am wuchenend hemmers Iigweiht und hend schön Znacht kochet! Ech ha frei gha wells aber ned werkli schön Wetter gse esch beni denn im Huus blobe und han under anderem Bachet und d Chefin mit Kids zum zvieri iiglade!
Woche 37 und 38
Ich wird sobald ich vo de Ferie zrugg ben alles verzelle öber mis Reisli is Nachberland. :) Nachberland! Er hends warschiindli alli metbecho ech ben ned nume uf australie nei i dene zwei wuche beni zerst id Schwiiz und denn uf Australie also i 14 Täg einisch umd Erdchugele sozsäge.Ech ha soo vell erlebt das chani euch do gar ned alles verzelle ech wird ir nechste Ziit en neui Siite mache nome vo dene Ferie zum gnauers z verzelle! Es send uf jedefall die schönste Ferie gse woni je i mim lebe gha han!
Woche 36
Die letschd Wuche vor mine Sydney Ferie ech ben scho meega nervös. Aber das klappet scho! Ech ha no z vell Antibiotika mösse neh zum derfe rechtig schaffe. Drom hends mi nome am Donnstig la mäle und am Afang vor Wuche send d Chind mine Hauptjob gse. Auto, Fänster und es Huus potze send d Näbeuufträg gse. S andere Huus esch för neui aagstellti und evtl wird ech de letschd Monet au det ine zögle. Es esch rechtig schön gse das z potze well ech han denn au derfe bestemme wie Iirechte und ech liebes Zimmer iizrechte und alles was met Dekoriere ect. z due hed. Am Friitig beni denn am Nomittag rechtig Queenstown und denn esches metem Flüger ab nach Sydney gange.....
Woche 35
Die Woche beni weder elei well d Familie id Ferie gaht ines Schuelcamp ufd Nordinsle. Ech ben ned werkli zwäg gse aafangs Woche und han entschiede am Ziistig zum Artzt z gah weli nömme ha chönne schlöcke/ässe set em Sunntig. De artzt hed den gseit er weig mi de Tag druf weder gseh wenns ned besseret und das den jede Tag am Friitig hani entschiede is Spital z gah. 2h fahre und endli hani gwösst was met mer los esch ech ha so angst gha das mini Mandle operiert werded das wer gar ned lostig gse för mech so elei z Neuseeland. Ech ben denn aber met stärchere Medikament weder hei ond somet esch die Wuche denn au verbii gse. Natürlich hani jede Tag gschaffet und ben ned nume bim Artzt ghoket. (Hett zwar besser nüt gschaffet hend alli gmeint aber das macht eim verruckt ohni esse und eleii imne Huus ohni stemm)
Woche 34
Die Woche hemmer faschd jede morge fürrote Himmel gha wonderschön! Bes jetzt esch de Neuseeland Winter supper warm natürlech emmer chli räge und chalt dezwische aber es wärmt emmer weder uf. I dere wuche beni sehr vell Auto gfahre z.b. zum Tierartzt ga sache abhole oder id Garage ga en neue Pneu hole well d Chefin z schnell ines Loch gfahre esch. Ech weis ned wases esch aber ergendöppis macht mech extrem müed ech ben jedesmal am obe vor de nüne iigschlafe. Am Sunntig beni uf Riverton det heds die berüehmte Muschle wo enne blau glänzed es esch en meega schöne Trip gse.
Woche 33
Ech han mi inzwische chli beruhigt und luege dasi meh komuniziere met all dene Liebe lüüt do unde. Es esch en supper wuche gse well die wuche hemmer 250 Chüeh troche gstellt das esch s erste mal gse das 7 Lüt es ganzes Team ufem Hof för 6 Stund nebenand gschaffet hed, es hed mi recht stolz gmacht das ech au han derfe Antibiotika spritze und die andere ned. Jetzt hemmer nomeno 100 zum mäle för die nechste 4 Woche das esch en halbstund arbet so rechtig härzig. Also zur zämefassig mer hend 250 Chüeh und 100 trächtigi Rindli Tag und Nacht im Stall und 100 no zum Mäle wo denn im Sommer chalberet. Also heisst das jede morge 2,5 h Stall potze und das esch emmerno en rechtig herti arbet. Einisch die wuche hed de Chef gholfe ech ha soo gstuuned das er soo gschnuufet hed nach nume 6 Liegeplätz. Usserdem hani erfahre das mer neui Praktikante bechömed wo helfed wen 300 Chüeh chalbered, uf das freuii mi au riesig de Chef wett mi den gern meh verusse ha.
Woche 32
No Emmer todmüed vor letschde wuche hani weder met de Familie gstartet. Am Mittwoch send d Munis gange soo schad.. Verzelled mer doch bitte mal ob er das au scho gha hend: Euche Chef esch id ferie und anstatt uf die fuul huut z hocke dönd er Emmer meh und meh schaffe und öberarbeitet euch rechtig, denn chund de chef zrugg und fragt was hend ehr eigentlech die ganz letschd wuche gmacht? Was mached ehr denn? Das esch bi mer so gse und es hed mi recht metgnoh.... ech setts eigentlech ignoriere weli ja weis wasi gleistet han aber es send halt vell so arbeite wo d Chefin nonie gmacht hed drum weis sies halt ned. Uf jedefall esch das denn ned so lustig gse i dem momänt. Die wuche hani jede Tag öber 12h gschaffet ir hoffnig es chiem meh Dankbarkeit aber ech glaub das brengt ebe au ned vell. Uf jedefall beni jede obe soo kapott ir letschde ziit dasi vor de achte iischlafe und am morge Emmer extreem heiss gha han (Fieber). D Chefin hed denn gseit si chön sech scho vorstelle was das esch, si heig das alle gha wo si schwanger gse seg...... Bääääng wien en Pfanne ufe Chopf troffe hed si dä satz werkli als wers ned scho gnueg hert dasi de sandro set 7 Mönet nömme gseh han. Bi dere Stell liebs grüessli uf Büre.
Woche 31
Oh Gott die wuche esch krass gse woni am Sunntig obe heicho ben nachemne supper znacht bim Julien hani es SMS becho vom Chef si seged am Mittwuch zrugg si möised zu ehm sinere Mueter ga zoberst vor Insle. Also beni metem Mark eleii ufem Hof gse und eleii förs Huus verantwortlich. Am Ziistig heds am morge Schnee gha uf de Blue Mountains und das esch denn au grad s einzige gse wo hell gsi esch. I dere Dunkelheit hani sogar en Muni ufem Paddok übersehe. Am Mittwuch hed d Familie spontan entschiede no länger wegzbliibe als wie abgmacht bes am Mittwuch! ( Das chönnteds au ned met jedem mache aber ech und de Mark mer send es iigspelts Team). Mis Wuchenend esch denn derför 3 Tägig gse und ech ben am Samstig obe ad Golden Guitar Awards ond obwohl ech niemer kennt han send mer träne cho... Ech wür soo gern au chönne es Country Girl sii wo so guet cha singe.... (Träume esch ja erlaubt oder) . m Sunntig und Mäntig beni zum Milford Sound gfahre d Strasse send Glatt gse aber d sunne rechtig schön. Ech han neui Lüt kenneglehrt us de USA und de Julien zum letschde Mal troffe.
Woche 30
Öberall heissts absched neh die Woche. Es esch werkli grad dä Monet wo alli Praktikante i Summer zrugg gönd! Drum hanis extreem gnosse alli nomol z gsee. Under de Woche hed sech alles um en 3 Wöchige Trip vor Chefin dreiht wo den aber ei Tag vor Abflug gstreche worde esch. Mer send alli recht deprimiert gse. Aber deför hani jetzt die nechste drü Wuchenend au Frei.Mer hend die ganz Wuche öppis welle met ca 20kg Chochöpfu mache aber ech und d Chefin hend kei Effizienti verwendig gfonde bes jetzt drum hani för de Aafang afe zweimal Öpfuchueche gmacht. Es hed die ganz Woche eigentlich nome gregnet so rechtig wüest und de Floss esch bi Fluetgfahr gse. D Paddoks send met neue Seee dekoriert worde und am morge zum Chüeh hole hed mer sech supper guet iipackt well Räge und die Chälti esch öppis supper unagnehms ir verbendig:)
Woche 29
Ouu mano mann die Woche hend sech d Rindli bi mer so rechtig unbeliebt gmacht! Well eis unbedengt en andere Weg hed welle neh hani för en 5 Minute Wäg am schloss 20Minute gha mini Nerve ech segs euch. Woni metne i stall cho ben hend zwei Manne mer entgegegrinset und ech ha nome denkt die wössed scho wieso si dere Arbeite ned mached die liebe Chefs! Am Mittwoch hani si grad weder döffe umejage unz zwar zum Ohrmarke steche und au det hend si sech uufgfüehrt wie die grösste Teenager die Rindli. De Stall hani jede Morge usepotzed und ech han Moskelkater a mine Ärm das esch unglaublech seg ech euch! Ech han weder mal derfe en Torte mache und am Wuchenend semmer Iiglade gse för de Absched vo es paar Praktikante zum Truthan esse a dem obe hani s erste mal gschafft för es speli 3h am Tisch z hocke. ( Monopoly) Am Samstig beni uf Queenstown am obe z Heriod em Barbsetzer sine 65 ga fiire und am Sonntig hani Ferie buechet. Ech ga uf Sydney und ech freu mi soo usennig! Am obe beni no met de Seraina uf Gore ga Mothersday luege das esch ganz en schöne Film.
Woche 28
Okeey so schön au mine Job esch nach emne Weekend wie das z Dunedin schlaft mer halt evtl au mal bir arbet ii..... hmm jaa so vell dodezue :) Of jedefall hani am Ziistig en geniali Arbet gha und han en 20cm schicht Mist derfe abesprötze bim Uuslouf vorem Stall! Wi eer uf de Titelsiite gsehn heds au vell ned erfreulichs geh die und letschd Woche aber mer bliibed ja positiv ned wahr! Die 2 Jährige Rindli hend dä friitig 3 Tierärtzt trochegstellt und das ganze hed för 80 Rindli ungloublichi 5h bruucht! Die Woche beni zweimal im Schwimmbad gse am Friitig obe esch Ladies Night gsee sehr cool so ohni Manne hend die Fraue kei Hemmige gha und mer send vo Wasserrutschi öber 12Meter Gumpilabyrinth zu Massage und Manikür, Pedikür in Gnoss cho alles uuszprobiere. Am Samstig morge beni d Anika und de Roan ga aafüre im Fessball und am Nomittag in Heriot ga Rugby luege das esch sehr lostig gse ar Rangverköndigung hed de Trainer vo sim Natel Nachrechte met de Spieler vorglese das gäbs back home au nie aber esch soo lostig gse!
Woche 27
Die Woche hani tatsächlech all die Cups fertig uusgwechslet und mer hend die 2 jährige Rindli gscannet ond es esch nome eis ned trächtig gse zum Glöck. Am Mittwoch beni weder is Aquadance met de Seraina es esch soo schön gse chli uuszpowere und da mer grad bim Sport send ech ha die Woche derfe a eim morge erfahre dasi am Obe darf 14 Chind in Fuessball coache supper uusgrechnet ech! Ech has öberlebt schlossendli hani en supper Hilf gha. Das wer eigentlech em Chef sin Job aber er hed es Meeting gha. Am Wochenend esch Duck Shoot Eröffnig gse das heisst am Friitig obe is Pub und am Samstig morge am sechsi hed s geballere aagfange a jedem Fluss, Tümpel und see send es paar Manne gse und hend ufd Ente ziilet. Mer hend drum am Samstig Sonntig schutz gsuecht i diverse Clubs und Bars in Dunedin es esch supper lostig gse! Am Sunntig semmer usserdem en Zugfahrt ga mache die esch au sehr gmüetlech gse!
Woche 26
Das esch mini Halbziitwoche es esch verruckt wie schnell die Ziit vergaht! Und no verruckter was alles so passiert do z Neuseeland! Am mäntig hemmer ANZAC Day ghaa denn hani nomol Frei gha das esch erennerigs Tag a Chrieg und es hed i jedem Dorf wie en Mäss gäh das esch eher selte z Neuseeland kenni bes jetzt niemer wo werkli no regelmässig id Chile gaht. Ech han das aber verschlafe ond ben am Nomittag nochli use of die sechsi beni uf Riversdale de Maik hed Geburtstag gha es esch scho lostig mer send en Huufe voll schwiizer gse wo met ehm gfiiret hend obwohl mer ehn noni lang kenned. Ech hans extrem gnosse met dene Schwiizer weli ja susch am Tisch dehei nome Dutch oder englisch ghöre. Am Mittwoch hed d Chefin Geburtstag gha si send aber vo do aa 3 Täg id Ferie und ech ha Sturmfrei gha am obe beni is Aquadance met de Seraina und de Marianne es hed extreem Spass gmacht. AM Donnstig esch au öppis lostigs passiert ech ben zum Mäle ga d Chüeh hole und es esch genials Wätter gse da ech nome met 3-4 km/h cha de Chüeh nache fahre hani mi entschede chli änezlegge und sönnele ufem Quadt. 2Minute spöter huuped en Lastwage hender mer wie verruckt läck bobi ben ech verschrocke. Er hed tatsächlech gmeint ech seg gstorbe ech kenn ne vom Pub nechst mal weni ehn gseh segi denn es seg kriminell mech soo z verschreke ech hätt ja chönne abem Quadt abegheie :) hihihi das esch soo lostig gsee. Am friitig hani Cremeschnitte gmacht ond am Obe esch d Familie zrugg cho ech ben denach no churz is Pub. Am Wuchenend beni vo de Seraina iiglade worde sii z Begleite de Catlins nache es esch sooo schön gse und mer hend es Bungalow ghaa sogar met TV mer hends so rechtig gnosse bimne Gläsli Malibu und Grondsätzlech seeehr vell gredt!
Woche 25
I dem Bettpflecht wuchenend hani natürlech ned lang chönne leggebliibe und ben am sunntig met de Riversdale schwiizer ga d Tapanui schwiizer bsueche. Am mäntig hani met de chinder de ganz Tag verplant gha mer send zeme uf Gore zerst ga Bike denn ga Bade und denach nochli ufe Spielplatz. Ech ha ned vo aafang aa chönne werkli dureblike wie ech met dene chinde sell umgah und si nutzed mech jetzt no ab und zue uus aber die Woche hani intensiv chönne metne zeme sii und has rechtig gnosse. A eim Tag beni sogar met de Anika zäme ga mäle. Und a zwei täg esch d Chefin weg gse also hani doh au im Huushalt alles parat ghalte. Am Friitig obe semmer scho am 6 ii losgfahre uf Dunedin a mis erste Rugby game es esch sehr interessant gsee euses Team hed aber leider en Niederlag mösse verchrafte. Denach semmer ga fäste inere supper Truppe vo 2 Fraue und 6 Manne. De samstig hemmer uusgschlafe und send denn ga schlittschuehlaufe und ga Bowle Dunedin esch werkli es sehr schöns ÖRTLI.
Woche 24
Ohreweh, Schluckweh, Halsweh, Chopfweh, Fieber und no veles meh hed mer de Start i die Woche wonderschön gmacht. Das Ohr woni nümi ghöre hed mer zerst chli angst gmacht aber ech han denn eifach extra vell gschaffet und das somet chli vergesse. Es hed rechtig lostig usgseh das ech die ganz Woche bi warmem wätter met ere chappe umegloffe ben dases chli gschötzt esch. A eim Tag hani en neui Arbet aagfange und zwar hani am Karussell bi de Cups d Gummiisätz usegresse und neui mösse iedröcke schwer vorzstelle wie hert das esch aber ech han för 20*4 ganzi 3h bruucht. Am Friitig hani mi denn doch dezue zwonge zum Dokter z gaa es esch sone lostige Maa gse und si hend nome gseit jede normal Mönsch wör set ere Woche im Bett legge :) Zur Info en Klinikbsuech in Nz chostet a 15 Minute 95 Doller am Wochenend hani leider Bettpflicht bechoo ech hasse nüt meh als das de ganz Tag im Bett sooo langwiilig. Aber ech han jetzt ziit d Homepage uufzfrische.
Woche 23
Herzlichi Gratulation! Deheii hed de Sandro d Autoprüeffig gschafft ech han mi so för ehn gfreut. Und anderi News vo de schwiiz ech ha met mine eltere skypet und han si no nie sooo müed gseh set ech weg ben si hend grad chli arbet deheii:) D arbeite die Woche send recht toll gse esch han Quadt gwäsche, Chüeh gmole, Chueche bachet, Chälbli zöglet, Cookies gmacht und Holz ghaket. Die Woche hed mi öppis bsonders grüehrt ech cha euch au gar nömme sege wisoo aber es hed mi en Person wo meega liebevoll esch und ech eigentlech noni lang kenne nome durs schriibe via whatts app zum brüele bracht und ech sii anschinend au! Er setted mal gseh wie schön die Sonneuufgäng do momentan send es esch rechtig toll die 400 Chüeh am morge ga iezhole bi dere Ussecht. Am Samstig beni am sebni uufgwachet met Fieber und Halsweh und han dur de Tag gluegt in Gore wasi öber de winter för Sport chönnt mache. Am obe beni spontan ane Ball es esch soo schön gse en Saal voller höbsche Fraue und alles Farmer und dezue Country Music en Traum. Am sunntig hani Bsuech becho vo de Marianne, Cristian und erem CHef vo Riversdale. Ech han ehne de Hof zeigt ond mer send aschliessend zeme de schwiizer Bur in Tapanui ga bsuecheund send det zum Kafi iiglade worde. Ab dem Nommitag hani i mim lingge Ohr nümi meh ghört.
Woche 22
Die Woche mosi ehrlech zuegeh esch hert gseh ech han denkt nach 5 Täg reise wird sech mini iistellig weder chli lockere heds aber ned grad am erste Tag hani im Chef sine Hilux verchratzet er hed gset das seg ned schlemm aber ech ha mi de ganz tag schlecht gfühlt. Ech ha mer vorgnah euch öber die Homepage möglechst das wenige Negative woni han z erspare aber vo dere Woche mosi euch eifach mal verrate das ech i minere Fernbeziehig sehr sehr starch am Abgrund stah. Ech ben so froh gseh sone starchi stötze z ha met mim Frönd woni abgreist ben aber ech denke ech rede för alli wo mal sechs mönet weg vonenand gse send. Mer lebt sech usenand. Trotzdem bliibt mer nüt anders öbrig als s Positive drus z gseh. A dem Wuchenend hani denn mal welle abstelle vo all dene Gedanke und ha mi met de Seraina troffe am Samstig obe för in Zirkus das esch so herzig gse 7 Lüt hend eus 2h lang underhalte alli im Bereich 17 Johr alt. Am Sonntig semmer a Lake Monowai gange si esch zemli de einzig mensch gse i dere Ziit woni z Neuseeland ha chönne chli rede er chönd euch ned vorstelle wie vell sone Person Wert esch obwohl si komplett fremd esch. Und deheii hani das Wuchenend no zum Hond gluegt well d Familie weg gsee esch.
Mis 5 Tage Osterweekend
Good Friday: Höt morge beni nach es paar guetzli bache rechtig Riversdale gfahre det hani d Marianne (GR) und d Rebecca (OW)ufglade und mer send zäme rechtig Te Anau gfahre. Ech han det Glüehwörmli Trip bueched und nachemne feine zmittag hemmer döffe an Bord steche. Mer send denn bim tollste Wetter zu de Höhle gfahre und hen tuusigi vo Glüehwörmli gseh es esch sooo romantisch gsii:) Und am obe hani bi ehne öbernachtet si wohned au ufere tolle Farm aber metemne schwiizer Bsetzer.
Saturday: Nachere churze Nacht hemmer höt ganz toll Brunchet, ech han en Hofrundgang becho und denn beni met de Marianne ufbroche. Plan: kei plan z haa. Ziel: d Westcoast entdecke. Und tatsächlech scho am erste Tag hemmers gschafft die ganz Westcoast doruf z fahre und hend sehr vell schöni Naturbelder gseh.
Easter: Höt semmer uufgwachet in Ross nebe eusem Auto en Hereford Muni und mer voll met Motivation zum wiiterfahre. Z Hokitika hemmer de erst stop gmacht ond send det die zwei Cousins vo mim Mami ga bsueche und dessen Aagstellte ech han a dem Tag mis erste schwiizer schnaps Kafi trunke und das in Neuseeland. Am obe semmer denn bi de Hamner Springs no schnell chli ga Relaxe und hend aaschliessend supper gschlafe im Auto wod Martina eus zur verfüegig gstellt hed.
Easter Monday: Höt hettemer welle d Eastcoast durab heizueh send denn aber nachemne Abstecher öber Akaroa uf Ashburton (Ga Osterhaase verteile) und am schluss nach Te Kapo gfahre a dä wondervoll see d Obestemmig esch eifach de Hammer gse!
Tuesday: Einisch Twizel-Riversdale direkt bitte... am See vor Twizel semmer under pinke wolke uufgwacht und hend eus uf de wäg gmacht mer send direkt heigfahre ond hend zeme gässe und eus nochli erholt vo dere aasträngig 3000 km Autofahre esch ned so eifach wiemer denkt.
All in all, thank you marianne for doing this amazing Trip with me it was Wonderful!
Woche 21
Letschd Jahr hani Ostere jede Tag gschaffet und das Jahr jede Tag frei gha das esch denn öppe Luxus! Ech han gar ned gwösst was aafah met all dere Ziit aber zo dem laange Weekend denn spöter.. zerst hani ja doch immerhee vier Täg gschaffet :) Es esch so rechtig Herbst und Chalt ech ben extreem froh das de Chälbli Job weggfalle esch und ech jetzt recht vell met de Chinde daf mache und ir chuchi am schaffe ben. Am mäntig esch De Otago Birthday gse also vo dem Teil vo Neuseeland wo ech lebe und drum hetti frei gha aber d Chefin hed aaköndt das si die Woche jede Tag Büro arbet hed und ech drom am Mäntig zu de Kidies gluegt han. Mer send nach chli bache und experimentiere am Nommitag zeme is Hallebad. Das isch es must do wenn mal öpper uf Neuseeland gaht gönd mal ines Dorf Hallebad er werded stuune. Verusse hend mer en riise Garte met supper vell Gmües mer chönd fasch jede Tag ergendöppis ernte und verarbeite! Am schlimmste send Courgettes dere hemmer jetzt gnueg för de nechst und öbernechst Winter.
Woche 20
De normali Ablauf hed weder gstartet und be de Tochter vom Chef isch glaub recht de Wurm drenne es hed die Wuche kei Tag geh wo si nach de schuel ned stur im Auto hoke blobe esch und bim znacht gseit hed si wett nüt ässe. Es liit warschiindli draa das eri Grosseltere weder in Holland send. Usserdem hemmer die Wuche die zwei letschde Chälbli vo dere Saison verchauft! Im Volleyball hemmer s Final gha det hätts 3 Pokäl gäh 1. und 2. Platz und die schlechtiste mer hend keine gha send öppe ufem vierte Rang gsee ech han im letschde spiel en Ball gsmasht und do heds mer ar Schultere ergendöppis gresse mal luege ob das besseret! Mer sett au kei Mord/Sport mache :) Jetzt hemmer einewäg Winterpause. Am Friitig morge am 5ii hani bi 12 grad im Huus derfe uufwache und bi 9 grad ga assistiere bim Herd Testing mini Finger send schier abgfrore. A dem Weekend hani welle nacheschlafe aber ech han eher s gegeteil gmacht und en Rekordsziit im Skype hani au änebracht mer fragt sech was mer 5h lang cha rede. Am Samstig obe beni uf Riversdale is Pub und han det 3 neui Schwiizer und ei Bayer kenneglehrt es esch supper lostig gsee und dezue esch no en Country live sänger det gsee. Am sunntig hends mi denn scho vermesst und d Rebecca, Marianne und de Maik send cho d Farm aaluege es esch soo interessant neui Lüüt kennezlehre dodezue chunsch ir schwiiz nie soo vell wie ech bim Reise.
Woche 19
Nachdem tolle Weekend hani mösse versueche weder i arbetsalltag iezchoo und trotzdem send emmerno d Martina und d Melanie omegseh also esches en interessanti Woche gsee. Ech han eigentlech jede Tag normal gschaffet d Chefin esch no zwei Täg weg gsee also hemmer nochli Freiheite ghaa d Martina esch a eim Tag d Blue Mountains ga laufe und d Meli hed fasch jede nomi mer gholfe bim mäle das esch lostig gse! A eim Tag han s Karussell derfe usenand schruube und 50 mal d Filterchnöpf vo de Absuugaggregat usepotze. Usserdem Am ziistig hend die zwei Ladys mer en Wöschleine gstellt metemne 20Johr Silvana Tuech draa und luuter Babysache en geniali Idee oder ned? Ech ha extreem freud ghaa! Am friitig obe hemmer met de Familie doo Geburtstag nachegholt esch recht churz und herzig zue und her gange. Denach semmer no is Pub und hends lostig ghaa bim Pool spele! Am samstig morge am 9 nii semmer rechtig Ashburton losgfahre met stops in Dunedin för Cowboystiefel aazluege, Moueraki Boulders zum Fötele und Timaru zum en zweiti Koffer förd Meli z hole hemmer au a dem Samstig nomol vell gseh! Am obe semmer bi de Martina ere Kollege gsee und hend es Hammermässigs Lagerfüür gha met Finnenkerzen Handmade sooooo romantisch:) Ech has gnosse ond nachere churze nacht hani mi am Sunntig vo dene zwei verabschedet! Das wasi a dem Sonntig erläbt ha weti nie weder erläbe! Ech ha dä ganz wäg eleii mösse fahre ben total öbermüedet gsee und verchältet und 6h fahrt nachemne Absched hend bi mer schnell zu 8h gfüehrt. Aber ech freue mi derför das si jetzt heil weder ir schwiiz aachoo send.
7.März.2016
Ohni Akku uf ergendemne Elektronische Grät hani am 12ii metemne spendierte Drink vo de Martina met ene zwei uf mine 20.Geburtstag aagstosse! Ech hans extreem hert gfonde dä Tag soo wiit ewäg vo allne mine liebe das chönder euch gar ned vorstelle. D Martina esch supper positiv gsee und hed mi Emmer weder guet abglenkt vo mine Gedanke id schwiiz! Ca am vieri semmer zum Auto ond hend welle versueche z schlafe. Ech ben am sächsi weder uufgwachet han mine schlafsak gnaa ond ben as Vorderrad vom Auto ghoket ond ha tatsächlech zwei stund i Hemu gluegt in Gedanke a mini Familie und Frönde und mini Zuekonft! De Hemu esch voll vo Sterne gsee wunderschön! Und ech ben ned werkli de Typ wo Heimweh hed aber doo hani schön vell träne ghaa was mech au meega glöcklech gmacht hed eigentlech. Ca am nünii semmer rechtig Queenstowncity nochli ga shoppe. Öbere mettag semmer ufe Gondola Hill gwanderet (alli voll motiviert ned wahr Meli) es esch de hammer gsee en geniali ussecht und mer hend denn det obe aagstosse met zwei chliine sektfläschlii. Am obe hettemer selle am viertel vor sebni in Tapanui sii förs Volleyball send aber erst am föifi losgfahre das hed eus denn ned glänget nume soo die letschde zäh Minute hemmer no zuegluegt bim aber si hend sogar gwonne. Aaschliessend beni no en Box Bier ga chaufe ond de Lee hed eus zu sech iiglade mer hends lostig ghaa zeme de Julien hed för mech en chueche bachet ech ha mi soooo riiiesig gfreut vomene kolleg woni set drüü Woche kenne! Nachetane hed d Martina mer eres Handy geh und gseit ech sell mal ufd Homepage ga luege gesagt-getan ech ha s Gästebuech uufdoh und........WOW....... ech ha soooo usennig freud ghaa und s vermesse gspört zugliich woni gseh han dasi i churzer ziit 44 neui Nachrechte gha han es macht mech soo absolut glöcklech dasi hei ben und in voller Müedigkeit angst gha han ech chöig mech ned bi jedem bedanke also hani es Video i umlauf glah woni völlig uufglöst gsee ben und ech wett mi au jetzt nomol bi allne bedanke Danke vellmal för dä toll 20.Geburtstag!
Woche 18
Ech be supper müed nach dene täg und wenn ech gwösst hett wie lang ech die müedigkeit nacheschleipfe wäri ned is Volleybal am mäntig trotzdem hemmer tatsächlech gwonne! Die Woche esch emotional de Höhepunkt vo minere besherige Läbensgschecht gsee. Ech ha am 2.3. die erste gschenkli per post bechoo und chärtli ech ha mi usennig gfreut. Am Friitig send d Martina und d Meli aachoo mer hend es genials Weekend ghaa am Samstig obe semmer uf Invercargill hend det Fondue gmacht ond send ga fäste. A dem morge hemmer eus vorgnah das Wuchenend machemer eus weder mal chic also semmer ga chleidli chaufe und tatsächlch hemmer alli es wunderschöns gfonde ech has gnosse nach 4 Mönet Gummistiefel in Dreckmantel:) Am sunntig semmer de Catlins nache ufe rechtig Queenstown. D Martina esch de ganz wäg selber gfahre krass was die Frau chaa ech wer scho laang iigschlafe nach nome 3h schlaf. Bim Heefahre of Queenstown esch öbrigens no öppis skurils passiert also i minere aasecht, ech ben öbers Martina Natel uf mini Homepage ga Gästebuechiiträg nacheluege und denn gsehni Frau Luzia Roos denne ech ben gschokt gsee nome scho well ech ir Luga welt es nüt be eigentlech hani mi geehrt gfühlt das sii drii schriibt und denn no zum Geburtstag gratuliert hed.
Woche 17
Die wuche esch extrem busy gse die ganz Familie esch uf Christchurch gfahre und hend denn die holländische grosseltere det am floghafe abglade.Das heisst ech und de Mark hend gluegt das alles uf de Farm guet wiiterlauft also hemmer eus uufteilt er hed am morge gmole ech am nomittag und ech ha am morge assistiert und er am nomittagd chälbeli hani alli eleii gmacht. Am Donnstig heds de ganz tag gregnet und ech ha de fuetretrog im Karussell potzt ganzi 3h för ca 25 meter de hed soo gläntzt das d chüeh am nomittag angst gha hend derfor. Ech ha au jede obe selber för mech kochet hed lostigi ergebniss geh Experimentierfreudig:) am sunntig wo si zrugg cho send hani gschaffet bes am eis und be am nomittag schnell ufd Blue Mountains för 6h ga wandere es esch de hammer gse!! Freiheit pur!!
Woche 16
Genau hmm.. wie fömmer aah ohni dasi mi mos schäme derför ? Also mer send die wuche tatsächlech 250 chüeh ab de cowline gloffe ufem weg i melchstand es esch relativschnell gange die weder iizfah und wie mer mech kennt ech ha nume glachet :) D Chind hend die wuche die erst Ukulele stund gha mann de krach! Dä samstig beni chrank im bett gläge weli am friitig ir chälti met nasse Haar und nume im Shirt gmole ha bi ca 12 grad und wind ech verzelle ned wisoo..... am sunntig hani de zum huus us müesse aber mer hed chli d Motivation gfehlt för öppis schlaus also beni eleii is Kino ghoket und ha en nomittag am floss verbracht ech han en Mission gha es schöns föteli förs mami metem selbstuuslöser aber niemer weis för was si das foti bruucht anschinend wettberwerbsfrag also bi dere glägeheit gönd dä summer schön vell is maislabyrinth z winike esch en supper sach hani ghört!
Woche 15
Die Woche esch churz gsee aber interessant ech ha zuegluegt bimene Kaiserschnett und gsee wies uusgseht wenn 7 Lämmli vonere NZ Made uufgfresse werde und ech han en cooli neui arbet gha ufem Dach vo dem riise Stall i de abwasserrinne s gras usezneh. Und deheii esch d Fasnacht fertig etzt ghört mer ganz vell usnüechterndi stemme weder mal wo sech melded. Das wuchenend esch de hammer gse mer send z 7te höch ad Field Days dasch en riiise usstellig in Gore gse und denn am Obe zum Lee ga Hamburger esse denn is Pub zum Pool spele, tanze und schwätze. Am samstig morge hani met deheii Skypet d Fabienne esch 18nii worde und hed gross gfiiret, be leider ned iiglade worde ;) Aber ech han soo freud ghaa dasi alli gseh han und das si spass gha hend. Denn semmer as Rodeo z Mataura das esch de Hit gse ech han soo vell schwiizerdütsch gredt wie sett 106 Täg nömme. Es esch scho fasch wie amne Geburtstag gsee, sogar gschenkli hani bechoo neui Öberraschige us der schwiiz! Danke euch för das tolle Weekend allne us Ashburtonund co. und Partyruum winike und co. So macht s lebe spass!!!!
Woche 14
Die Woche hed d Schuel weder aagfange und mer hend die ganz wuche insgesamt 22 Chälbli ghaa a eim morge hani es kompletts dörenand gha weles zu welere mueter ghört und de Chef esch a dem Tag nume einisch hässig gse hed aber ned verzellt wisoo! Ir nacht hani sooo schlecht gschlafe und ehn am nechste Tag zur red gstellt es esch denn uuscho das ir hetz en chueh a Milchfieber sogar gstorbe esch drum escher ned guet aazspreche gse. Ech mach mer schnell mal sorge dasi ned guet schaffe doo aber si hend au gseit solangs so guet laufi met mer bim mäle suecheds ned grad en ersatz! Bedüted för mech eifach meega vell arbet! Bim Chälbli tränke am morge hani die Woche scho gschwetzt bevor ich d hälfti tränkt haa es esch soo heiss gse. Und de erstchälbli d Milch metem Tubefeeder i hals abezlah esch au en chnochejob Emu för mech ! ( Bitte lached ned manne ben au nume en Mensch ). Usserdem hani die Woche de Felix im Pub nomol troffe und ben ane Marshmallow grillobe iiglade gsee. Am sonntig beni en tour dur de River ga mache und am Mäntig hani dank em Waitangi Day nomol Frei gha und be ufd Blue Mountains zum Wasserfall. Bim Volley semmer weder nume zwei gsee aber hetted fasch gwonne !
Woche 13
De Sommer esch zrugg nach ere regnerische Wuche Hemers jetzt erläbt es paar täg henderenand Emmer 25 grad obsi! Mer hend tropfe gschwetzt, jede Tag zwösche vier und sechs Chälbli und ganz vell arbet im Huus und bim Siliere usserdem beni jede Tag am mäle gse. Am samstig hani de Felix ufe Bus bracht er reist jetzt en Monet ome, scho krass wie sehr mer en wildfremde Mönsch nach nume 3 mönet cha is herze schliesse! Usserdem beni amne Rodeo gse es ganz herzigs und chliises nume ca 500 Lüt de Hammer ech glaub nume scho d Rodeos wered en grund in Neuseeland z bliibe för mech ech has Rodeo Fieber! Und am mäntig obe hed s Volley weder gstartet mer hetted fasch gwonne send aber leider nume no es 3 er Team . :)
Woche 12
Wie die ziit vergaht danke Irene förs erennere so langsam vergessi vor luuter stress sogar d IIträg z mache. Bi eus hed d chalbersaison aagfange und de holländer Ruben esch ned zruggcho drum wird ech jetzt voll igspannt im Stall und es gfallt mer extreem es get doch nüt schöners als am morge am sebni als erste Job ga es Chälbli vo de Mueter wegnäh:). Usserdem hani en neue Job bechoo nachem Stall use potze metem Hochdrockreiniger chund jetzt zwesche allne wise under de züün s höche gras schniide met de Motorsägesse( Arbetsbeschaffig) ond da de Ruben ned zruggcho esch hemmer aagfange sis Huus renoviere zum denn z verchaufe. Usserdem hemmer Milchwägete gha was in Neuseeland en sehr moderni arbet esch. Ich fende es esch soo krass wie vell ech Emmer dezueleere doo. z.B.Milkfiever, Tapete aamache, wie en chueh zwesche 30cm iisepföste uselöpfe, 4 Wheeler Reservetank usw. Und am Wuchenend beni denn met de Sophie nach Queenstown gange es esch sehr sehr lustig gse und mer send weder ufne Junggselleabsched gstosse das mal sebe Australier.
Woche 11
Diese Woche war die Familie zuerst im Urlaub und ich habe sehr viel alleine gemolken.Und angefangen mit einer eher mühsamen arbeit ich muss allen Zäunen nach das Gras mit der Motorsägese abschneiden. Am Weekend ging ich mit Felix zum untersten Punkt der Insel dem Ort Bluff ein bisschen wandern es war soo wunderschön, wir sahen auch am gleichen Tag ein Stockcar race die fuhren ganz nach dem Motto kein Auto geht ganz nachhause! Am abend hatte ich das erste mal seit zwei Monaten wieder die Gelegenheit in der grossen Zivilisation zu feiern und wir (Felix, Sophie und ich) gerieten in eine lustige truppe die den Jungesellenabschied feierten. Am Sonntag gingen wir an ein Motrbike Race und wir wurden Begleitet von Sereina aus der Schweiz und Karsten+Johannes aus Deutschland es war sehr lustig und Interessant.
Woche 10
Die Woche hemmer wättermässig alles gha usser Schnee! Am morge esches meistens chalt gsee und denn gege nomittag bes zu 30 grad worde. Am wuchenend hani vorgha de Blue Mountains nachezlaufe aber de wend esch vell z starch gse mech hätts bi 100 km/h grad weggchutet. Drum beni met de chinde am spele gse und han en nomittag lang en road trip gmacht gha und weder vell interessants gse. Usserdem hani erfahre wie z Neuseeland de chüeh chlaue gschnette wird. Es esch soo interessant gsee ech han einehalb täg lang gholfe chüeh triibe und er hed 350 chüeh d chlaue gschnette es esch super schnell gange. S Highlight vor wuche esch s skype met de Familie Kaufmann us Nüderef gsee ech ha soo freud gha dasi metne ha chönne rede nachdem ich si ledschd wuche versetzt haa!
Woche 9
Soo schnell vergönd die Wuche und scho hemmer 2016. Ech han das Jahr in Neuseeland gstartet aber ich ben geistig ganz ir schwiiz gsee.Am 2. Januar beni amne Rodeo gsee d Martina hed sech uf de Wäg gmacht und mer hend scho s zweite tolle Weekend zäme ghaa! Da de Samstig de zweit Januar gse esch hend d Neuseeländer die toll Regle dä fiertig mues kompensiert werde und ech ha die wuche weder nume vier täg müesse schaffe. Ech han jede morge derfe ga d chüeh und chalber zögle metem Töff es get nüt schöners als früeh uufzstah und de landschafte zuezluege wie si uufwachet.
Woche 8
Vor dere Wuche hani Emmer am meiste Angst gha d wiehnachtswuche. Ech ben aber i dere wuche bsunders glöcklech gsee ech han vell Post bechoo und es genials Summer Wiehnachtsfestli ghaa metemne hängende wiehnachtsbaum ;) De chrönendi Abschloss esch en spontantrip zur Martina gsee ech ben 20h Auto gfahre met Polizeistop inklusive und han bi de Martina zwei geniali Täg verbracht soo wie zweiti wiehnacht eifach am Strand.
Woche 7
Die Wuche esch ganz de vorbereitige för Wiehnachte gwedmet gsee. Am aafang send d Mia und de Hermann ga de Ruben ufe Flughafe due er esch jetzt sechs wuche in Holland i dere Wuche hani jede Tag derfe mäle wärend die andere mnne silo gmacht hend. Am Wuchenend beni ga Wiehnachtsshoppe und am Sunntig anes Pferderenne in Gore es esch de hammer gse alli send i Chleider umegloffe und d Manne i Azög.
Woche 6
I dere Wuche heds aagfange metemne truurige Absched vo de Sanja ech kenne si erst set föif wuche und han si so i mis Herz gschlosse well si eifach vo afang aa mini perfekt understötzig gse esch. Ech hans aber met schaffe schnell gschafft mech abzlenke und mer hend die Wuche au zwei schuelaaläss gha Prize giving wies abschlossfest und Santa in School. Am Wochenänd esch d chindergeburiparty gse und ech han beschlosse möglechst nüt z underneh und mini neu entdeckte Chnoche und Muskle la gruihe :) während deheii s Musigkonzert gse esch und ech mech öber jedes Foti und Video gfreut han . Im Volley esches au s ledschde mal gse und mer send sehr guet gsee in sechs wuche gahts denn wiiter!
Woche 5
I dere Woche hemmer grad chli betreb ghaa d eltere vor Marloes send aagreist vo Holland. D Eltere vo de Sanja send doo und scho esch de Tesch gstosse voll. Leider send i dere Wuche d Sanja und eri Eltere au abgreist. Und am Wuchenend hend d chind Geburtstag gfiiret do send au vell Iglade gse und ech han tolli Torte gmacht. Usserdem esch Silier wätter mer hend a eim obe bes am elfi Pneu ufd Plache grüert. Ech ben au sehr vell am mäle und han a eim Obe för de Pregnancy Scanner 43 Chüeh ussortiert und am andere Obe d chüe aagmalet wo träget. Am Wuchenend beni metem Felix zu de Catlins gfahre es esch wunderschön gsee wens nach de Landschafte gieng wetti do nöme weg es get z Neuseeland eifach alles!
Woche 4
Ech han erfahre das ech zwenig informatione i mis Tagebuech schriibe. Aber mis lebe doo faht aa sech rechtig z bewege. Ich ben set emne Monet doo und die wuche ganz eleii gse well d Sanja und de
Ruben zeme id ferie send. Ech han gmerkt wies esch ohni schwiizer onderstötzig und es esch supper gange. Am Wuchenend beni eleii ufd strecki und han sehr vell gseh mer cha z Neuseeland locker en
Tag umefahre und Emmer öppis anders gseh. Am mäntig druf hemmer am Obe Volleyball ghaa, da d helfti gfählt hed semmer ned soo guet gse. I dere Woche beni ganz vell eleii ga mäle alli 430 Chüeh
und han mi met de Motorsägesse aagfröndet ech han extrem freud a dene körperleche arbete. Genau wies Pneu wechsle :) Aber au Choche dafi vell ech han sogar Älplermagrone gmacht aber met dem chäs
doo chamers ned esse!!
Woche 3
Ech ben komplett fasziniert was mer alles cha neus kenneleere i einere Wuche. Die wuche hani ca 5 mal Pneu gwechslet ben för ei leferig 4 Stund Auto gfahre und han so zemli all 70 chalber
einisch vom einte Farmegge zum andere gsteukt. Ar A&P Show hemmer au extrem vell gseh Cake, Animal, Coloring, Wood, Riding, Sheep Shearing Competition und no vell meh... Ech han met
velne Lüt Kontakt knöpft am Obe semmer spontan iiglade worde und aaschliessend denn is Pub ga fiire.
Woche 2
Die Wuche hani supper vell gleert ech darf scho nach einere wuche metem Auto linggs fahre es esch supper met dene grosse Auto über die wiite Chies Strasse z chessle. Zuedem hani scho zwei Milking
Lessons gha es esch de hammer! 400 Chüeh z mäle esch werkli en chnochejob. Aber de Hammer! Bi de Chalber esch eus die wuche au vell passiert z.b. hemmer einisch müesse Chalber zögle und denn esch
eis vor strass abgrutscht ine chline Fluss mer hend die andere schnell zöglet und womer zrugg cho send esches nömme ume gse mer send gschokt gsee!
15.11.15 Bachtag
Ech ben höt morge en churzi strecki im suzuki gfahre leute es get keis schöners gfühl als wenn du am morge ines padock fahrsch und 40 chalber renned zu der well si freud hei dech z gseh. (nei
natürlech well si durst hei :) Denn am mettag hani met de Sanja Grittibänze und Zopf gmacht und chli Spitzbuebe bache da chund Wiehnachtsstemmig uf. Mer brüchti nume nochli
Schnee.
14.11.15 Samstag
D wuchenend send zemli locker und höt hani am morge weder gholfe mer hend welle s silo zuedecke met Plastik und den Pneu druflegge uf das Heu wo gester zeme gna worde esch aber bes mer met de
chinde bim Stall gse send sei d mane scho fertig gse. Am Nommitag semmer an River ga bade und am Obe is Pub z Tapanui. Und do en chliine Tipp lönd d Jasscharte deheii er werded nume ghüslet
aagluegt well Billiard esch da es muss. ( Mer brenged denn scho no en Kiwi zum Jasse)
13.11.15 Freitag
Höt beni de erst Tag ohni d onderstötzig vo de Sanja am schaffe gse mer hend am morge met em Jonathan und de Marloes d Munichalber zämetrebe well die höt abtransportiert werded und denn semmer uf
Gore gange all min Bürochram ga erledige. Am nomi beni eleii gse met de Kidies am obe semmer uf die sebni verabredet gse zum ga fisch und Chips esse.
10.-12.11.15 Dienstag bis Donnerstag
Zmorge mache, Chinde wecke, Chälber tränke das esch jede morge zemli de gliich Rhythmus und am Nomi hemmer jewils spontani arbeite gha. Am Donnstig heds en wunderschöne Rägeboge öber Neuseeland
gha. D Sanja und ech send uf de Ladeflächi vom Suzuki ghoket und hend öbers Läbe diskutiert debii semmer eus vorchoo wie d Becki und d Jodi vo Mc Leods Töchter es esch es genials Feeling doo z
buure.
9.11.15 Montag
Es esch höt weder mal en wunderschöne Tag gsii die riise Felder send vom morge bes am Obe met de schönste sonnestrahle und de füechtiste Regetropfe bedeckt worde ech ben eigentlech de ganzi Tag
de Sanja ga assistiere ech lehre supper vell vo ere. Am obe hed si mech metgnah is Volleyball ech han ir schwiiz scho Emmer welle ine Verein entweder ga Volley spele oder eifach turne im
allgemeine. Jetzt beni öberglöcklech dasi en grund han well do leri lüt kenne. Euses Team bestaht momentan us emne Holländer, 2 Franzose, 1 Irländer, 1 Münchner und de Sanja und mer.
Mer hend 1 vo 3 Turnier gwunne sehr guet wöri sege för das dass mer no nie trainiert hei zeme :)
7.+8.11.15 Samstig und Sonntig
Ech han s ganze Weekend so zege es kennelern weekend gha ech ben met de sanja d praktikantin wo glii hei gaht vom kanton glarus dur gore gloffe wo si mer alles chli zeigt hed denn dur tapanui und am samstig obe semmer z heriod is pub und det hani no anderi farm assistanst troffe. Es esch rechtig cool d neuseeländer send soo verhängt und locker si gönd sogar met de gummistiefel is pub. Machi i de schwiiz au mal.
6.11.15 Friitig
Ech han die erst nacht supper gschlafe und daf höt met a pet day vo de chinde.Det derfeds eri eigete tier metneh und denn macheds en art viehschau die wo am beste güebt hend gwönned. D annika und de roan hend bedi es lamm debii ghaa.
5.11.15 Donnstig
Ech han vom Hostel bes zur Farm no en wiite Wäg gha und ben met em Bus 7 stund gfahre es esch toll gse und ech han sehr vell gseh. Bir akunft hani mi extrem gfreut und trotzdem Emmer weder fasch
müesse afoh brüele weli deheii alli verlah han.
2.11.15 Mäntig
Höt am obe beni vo minere Familie und em Sandro a Flughafe bracht worde. Ech han mi gfreut und scho fasch brüelet bim gedanke dases halt doch es Jahr esch. De flug esch denn met 3 zwöschestopp
ganzi 20 Stund gange und met ziitverschiebig beni denn am Mettwoch aacho und han imene Hostel öbernachtet.
30.10.15 Friitig
Ech han all mini liebste Iglade zum Znacht weli ja mine 20.Geburi ned chan deheii fiire esch mer das sehr am härze gläge. Ech hans extrem gnosse und mer hends au recht lustig ghaa. S esse esch de hammer gsee s mami hed extra för mech mis lieblingsesse kochet und es esch bi allne guet aachoo. De absolut emotionalsti und romantischti Moment hani gfunde wo mer hend derfe wunsch heissluftballön i Himmel ue lah. Danke euch allne vellmal.